
香巴噶舉教言集NG13ནི་གུ་ཆོས་དྲུག་གི་འཇུག་སྒོ་ཡོན་ཏན་ཀུན་འབྱུང་བཞུགས་སོ།།
1-149
༄༅། །ནི་གུ་ཆོས་དྲུག་གི་འཇུག་སྒོ་ཡོན་ཏན་ཀུན་འབྱུང་བཞུགས་སོ།།
༄། །སྦྱོར་བ།
༄༅། །ནི་གུ་ཆོས་དྲུག་གི་འཇུག་སྒོ་ཡོན་ཏན་ཀུན་འབྱུང་བཞུགས་སོ།། ཨོཾ་སྭསྟི། ཤངས་པ་བཀའ་བརྒྱུད་ཀྱིས་ཆོས་སྐོར་རྣམས་ཀྱི་འཇུག་སྒོ་ཡོན་ཏན་ཀུན་འབྱུང་ཞེས་བྱ་བ། རྡོ་རྗེ་འཆང་ཆེན་ཡེ་ཤེས་
མཁའ་འགྲོ་མ། །ཁྱུང་པོ་རྣལ་འབྱོར་རིན་ཆེན་བརྩོན་འགྲུས་དང་། །དར་མ་སེང་གེ་རྒྱལ་བ་འོད་ཟེར་དང་། །བླ་ཆེན་ཁམས་པ་ཆོས་རྗེ་འཛིན་པ་ལ། །ལུས་ངག་ཡིད་གསུམ་གུས་པས་སྐྱབས་སུ་མཆི། །མཁའ་
མཉམ་སེམས་ཅན་རྣམས་ལ་བྱིན་གྱིས་རློབས། །ཐབས་ལམ་སྒྱུ་ལུས་འབྱོངས་པར་བྱིན་གྱིས་རློབས། །རྨི་ལམ་འོད་གསལ་ཟིན་པར་བྱིན་གྱིས་རློབས། །འཕོ་ཐེབས་བར་དོ་ཆོད་པར་བྱིན་གྱིས་རློབས། །མཆོག་གི་དངོས་གྲུབ་ཐོབ་
པར་བྱིན་གྱིས་རློབས། །འདིར་སྦྱོར་བ་དངོས་གཞི་རྗེས་གསུམ་མོ། །དང་པོ་ནི། ས་ཆོག་དགོས་པར་རྒྱས་བསྡུས་གང་གྲུབ་གཞན་དང་མཐུན་པར་བྱ། གནས་ཁང་ཕྱག་དར་རྟེན་འགྲམ་གྲུབ་ན་དཀྱིལ་འཁོར་ཡོངས་རྫོགས་
བསྒོམ་པར་འགྱུར་བ་དང་མཐུན་པར་གཞི་བྲི། མ་གྲུབ་ན་མཎྜལ་བཞིའི་ཐིག་གདབ། དང་པོ་ལ་ཆོས་འབྱུང་ཉིས་བརྩེགས་དཀར་པོའི་དབུས་སུ་མེ་ཏོག་ཚོམ་པུ་ལྔའམ་ལྷ་ལྔའི་ཕྱག་མཚན་ནམ། ས་བོན་ནམ།
ཐིག་ལེ་བཀོད། དེའི་མུ་ཁྱུད་ནག་པོ། རྩིབས་ཆེན་དམར་པོ། དེའི་འོག་མ་ལ་པདྨ་འདབ་བཞི་ཕྱོགས་མཚོན། གྲུ་ཆད་ལྗང་ཁུ། གསུམ་པ་ལ་ཆོས་འབྱུང་དམར་པོ། མེ་རིས་གཞི་ལྗང་ཁུ། ཟླ་གམ་མཐིང་ལྗང་དཀར་པོ། 
1-150
བཞི་པ་ལ་མཐིང་ནག་གྲུ་གསུམ། མེ་རིས་གཞི་དམར་པོ། ཟླ་གམ་ལྗང་ཁུ། དེ་རྣམས་ཀྱི་མུ་འཁྱུད་ནག་པོ། མཎྜལ་ལས་མི་གྲུབ་ན། མུ་འཁྱུད་ཀྱི་ཕྱི་ནས་རྡོ་རྭ་མེ་རི་བྱ། ཡོངས་རྫོགས་
གྲུབ་ན་ཐམས་ཅད་ཀྱི་ཁྱམས་ཕྱོགས་ཚོན་ལ་སོགས་དཀྱིལ་འཁོར་བསྒྲུབ་པ་དང་མཐུན་པར་བྲིས། འོག་མ་གསུམ་པོ་ལའང་ཚོམ་བུ་ལ་སོགས་ལྔ་ལྔ་བཀོད། བུམ་པ་མཚན་ཉིད་དང་ལྡན་པ་བཅུད་དང་མགུལ་
ཆིངས་ཁ་རྒྱན་རྡོ་རྗེ་གཟུངས་ཐག་དུང་ཆོས་རྣམས་གཞན་དང་མཐུན་པར་མཎྜལ་གཉིས་པའི་སྟེང་དུ་བཞག བཞི་པའི་སྟེང་དུ་གཏོར་མ་གཙང་ཞིང་བཟང་བ་མདའ་དར་དང་བཅས་པ་བཞག ཅི་འབྱོར་བའི་མཆོད་
གཏོར་དང་། ཚོགས་ཀྱི་ཡོ་བྱད་བཤམས། སྔོན་འགྲོའི་གཏོར་མ་མཁའ་འགྲོ་སྤྱི་གཏོར་གྱིས་བཏང་། མཆོད་པ་བྱིན་དབབ། ལས་ཀྱི་རྡོ་རྗེས་སྤྱིར་མཎྜལ་དང་། སོ་སོ་ལ་མེ་ཏོག་ཕུལ་ལ་གསོལ་བ་བཏབ། སྐྱབས་འགྲོ་
སེམས་བསྐྱེད་ཡིག་བརྒྱ་རྣམས་ཅི་འགྲུབ་བྱ། རང་བདེ་མཆོག་ཏུ་གསལ་བའི་ཐུགས་ཀའི་ཧཱུྃ་གི་འོད་ཀྱིས་རྒྱུད་སྡེ་ལྔའི་ལྷ་ཚོགས་བླ་མ་གཙོ་བོའི་རིགས་བདག་ཏུ་བཞུགས་པ། སངས་རྒྱས་དང་བྱང་ཆུབ་སེམས་
དཔའ་དཔའ་བོ་དང་མཁའ་འགྲོའི་ཚོགས་སྤྱན་དྲངས། ཕྱག་འཚལ་མཆོད་པ་དབུལ། རྒྱུན་བཤགས་བྱ། ཚད་མེད་པ་བཞི་བསྒོམ། ཤུ་ནྱཱ་ཏ་དང་། སྭ་བྷཱ་ཝས་སྟོང་པར་སྒོམ་པའི་ངང་ལས་སྲུང་འཁོར་རྟེན་དང་བརྟེན་པར་བཅས་པའི་བདག་བསྐྱེད་ཡན་ལག་བཞི་རྫོགས་སུ། 
1-151
མདུན་སྐྱེད་མཎྜལ་དང་བསྒྲུབ་པའི་སྐབས་བཞིན་བསྒོམ། ཆོས་སྐོར་འདི་ཡི་ལུགས་ཀྱི་རྫོགས་རིམ་གང་མོས་བསྒོམ། ལྷ་རང་རང་གི་ཐུགས་ཁར་པད་ཉིའི་སྟེང་དུ། ས་བོན་ཧཱུྃ་གི་མཐའ་མར་རང་རང་གི་སྔགས་
ཀྱིས་བསྐོར་བར་བསྒོམ། ཨོཾ་ཧྲི་ཧ་ཧ་ཧཱུྃ་ཧཱུྃ་ཕཊ། ཨོཾ་དེ་ཝ་པི་ཙུ་བཛྲ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་ཊིག་ཧཱུྃ་སྭཱ་ཧཱཿ ཨོཾ་ཨཱཿཧྲི་ཧཱུྃ་ཕཊ་སྭཱ་ཧཱ། ཨོཾ་ཨོཾ་ཧྲྀཥྚི་ཝི་ཀྲི་
ཏ་ན་ན་ཧཱུྃ་ཕཊ། ཅེས་པ་རྣམས་སོ་སོར་ཅི་ནུས་སུ་བཟླས་སོ། །དེ་ནས་ཕྱི་མཆོད་རྣམས་སུམྦྷ་ནིས་བསངས། སྭ་བྷཱ་ཝས་སྦྱངས། ཨ་ལས་ཐོད་པར་འབྲུ་གསུམ་ལས་ལྷ་མིའི་མཆོད་རྫས་དཔག་ཏུ་
མེད་ཅིང་དྲི་མ་དང་བྲལ་བར་བསྐྱེད། རང་རང་གི་སྔགས་དང་ཕྱག་རྒྱས་བྱིན་གྱིས་བརླབ། མཎྜལ་བུམ་པ་རྣམས་ཀྱང་རིམ་བཞིན་བསངས་སྦྱངས་པའི་ངང་ལས་ཐམས་ཅད་ཀྱང་། ཡེ་ཤེས་རང་སྣང་གི་གཞལ་ཡས་
ཁང་གྲུ་བཞི་སྒོ་བཞི་རྩིག་པ་ལྔ་ཕྱི་ནས་རིམ་པས་དཀར་སེར་དམར་ལྗང་སྔོ་བ། འདོད་ཡོན་དམར། ཕ་གུ་སེར། དྲྭ་ཕྱེད་སྔོ། །མདའ་ཡབ་སྣ་ཚོགས་སྒོའི་ཐད་སོར་རྟ་བབ་བང་རིམ་བཞི་པ་
ལ། པདྨ་ལ་གནས་པའི་འཁོར་ལོ་དང་། རི་དྭགས་གཉིས་གཉིས་དང་བཅས་པའི་སྟེང་ན་གདུགས་ཕུབ་པ། ནང་ཀ་བ་བརྒྱད་བརྒྱད་ཀྱི་སྟེགས་ཅིང་། རྡོ་རྗེའི་གདུང་བཞིས་མིག་མང་རིས་སུ་བྲིས་ཤིང་མཛེས་པར་ཕུབ་པ། 
1-152
དབུས་ཕྱུར་བུར་གྱུར་པའི་རྩེ་མོ་རྡོ་རྗེ་དང་ནོར་བུའི་ཏོག་གི་མཚན་པ། མཆོད་རྟེན་མགོ་ལྔ་པའི་རྣམ་པ། ཕྱི་རོལ་དུ་དུར་ཁྲོད་བརྒྱད་དང་། རྡོ་རྗེ་རྭ་བ་མེ་རིས་བསྐོར་བ། སྣང་ལ་
རང་བཞིན་མེད་པ་འོད་ཀྱི་རང་བཞིན། ནང་གི་ལྷ་སྣམ་རྣམས། ཤར་དཀར། ལྷོ་སེར། ནུབ་དམར། བྱང་ལྗང་བའི་ཕོ་བྲང་དང་པོའི་དབུས་སུ། ཤེལ་ལས་གྲུབ་པའི་ཆོས་འབྱུང་གཉིས་རིམ་གྱི་ལྟེ་བའི་དབུས་
སུ་རིན་པོ་ཆེའི་ཁྲི། སེང་གེ་བརྒྱད་ཀྱི་སྟེགས་པ་དང་། སྣ་ཚོགས་པདྨ་ཟླ་ཉིའི་སྟེང་ན། འཇིགས་བྱེད་དུས་མཚན་མནན་པའི་བདེ་མཆོག ཞལ་གཅིག་ཕྱག་གཉིས་རྡོ་རྗེ་དྲིལ་བུ་འཛིན་པ། ཡུམ་ལ་འཁྱུད་
ཅིང་གཡས་བརྐྱང་པས་བཞེངས་པ། ཡུམ་རྡོ་རྗེ་ཕག་མོ་དམར་མོ། ཞལ་གཅིག་ཕྱག་གཉིས་གཡས་གྲི་གུག་ནམ་མཁའ་ལ་འཕྱར་བ། གཡོན་ཐོད་ཁྲག་འཛིན་པས་ཡབ་ལ་འཁྲིལ་བ། དེའི་ཤར་དུ་གདན་བཞི་རྩེག་
གི་སྟེང་ན་ཚངས་པ་བརྒྱ་བྱིན་མནན་པའི་དགེས་རྡོར་མཐིང་ནག་ཞལ་གཅིག་ཕྱག་གཉིས་རྡོ་རྗེ་དྲིལ་བུ་འཛིན་པས་ཡུམ་བདག་མེད་མ་སྔོན་མོ་གྲི་གུག་དང་ཐོད་ཁྲག་འཛིན་པ་ལ་འཁྱུད་པ། ལྷོ་
ཕྱོགས་སུ་གདན་བཞི་རྩེག་གི་སྟེང་དུ་གསང་འདུས་སྐུ་མདོག་མཐིང་ཤུན་ལྟ་བུ། ཞལ་གཅིག་ཕྱག་གཉིས་པ་རྡོ་རྗེ་དྲིལ་བུ་འཛིན་པས། ཡུམ་རེག་བྱ་རྡོ་རྗེ་མ་སྐུ་མདོག་ཕྱག་མཚན་ཡབ་དང་འདྲ་བ་ལ་འཁྱུད་ཅིང་། 
1-153
གཉིས་ཀའང་སྐྱིལ་ཀྲུང་དུ་བཞུགས་པ། ནུབ་ཏུ་གདན་བཞིའི་རྩེག་དང་། མི་རོའི་སྟེང་ན་མ་ཧཱ་མ་ཡ་མཐིང་ནག་གཡས་བརྐྱང་གཡོན་བསྐུམ་ཞལ་གཅིག་ཕྱག་གཉིས་ཁཱ་ཊྭཱཾ་ཀ་དང་ཐོད་ཁྲག་འཛིན་པས། ཡུམ་
སངས་རྒྱས་མཁའ་འགྲོ་སྐུ་མདོག་ཕྱག་མཚན་ཡབ་དང་འདྲ་བ་ལ་འཁྱུད་པ། བྱང་དུ་གདན་བཞི་རྩེག་དང་མ་ཧེའི་སྟེང་དུ་རྡོ་རྗེ་འཇིགས་བྱེད་ནག་པོ་མ་ཧེའི་ཞལ་ཅན། ཞལ་གཅིག་ཕྱག་གཉིས་གྲི་
གུག་ཐོད་ཁྲག་འཛིན་པས། ཡུམ་རོ་ལང་མ་དམར་མོ་གྲི་ཐོད་ཅན་ལ་འཁྱུད་པ། རྭ་རྣོ་བ། ཤངས་འབུད་ཅིང་མཆེ་བ་གཙིགས་པ། ལྗགས་འདྲིལ་བ། སྐུ་ལུས་ཐུང་སྦོམ་གསུས་ཁྱིམ་ཆེ་བ། སྦྲུལ་གྱིས་
ལྷག་པར་བརྒྱན་པ། མཎྜལ་གཉིས་པའི་བུམ་པ་གཞལ་ཡས་ཁང་དུ་བསྒོམ་པའི་ནང་དུ་ཡང་ལྷ་ལྔ་གོང་བཞིན་བསྐྱེད། མཎྜལ་གསུམ་པ་ནི། ཏིང་ངེ་འཛིན་གྱི་དབང་གི་རྟེན་ཡིན་ཏེ། དེའི་དབུས་སུ་བདེ་
མཆོག་ལྷན་སྐྱེས་དང་། དེའི་ཕྱོགས་བཞིར། ཤར་དུ་མཁའ་འགྲོ་མ་ནག་མོ། བྱང་དུ་ལཱ་མ་ལྗང་ཁུ། ནུབ་ཏུ་ཁཎྜ་རོ་ཧེ་དམར་མོ། ལྷོར་གཟུགས་ཅན་མ་སེར་མོ་རྣམས་ཞལ་གཅིག་ཕྱག་གཉིས་གྲི་ཐོད་
འཛིན་ཞིང་། གྲུ་མོ་ན་ཁ་ཊྭཱཾ་ཀ གཡས་བསྐུམ་གཡོན་བརྐྱང་རོའི་གདན་ལ་བཞུགས་པ། དེ་ལྟར་ཡབ་ཡུམ་ཐམས་ཅད་མཚན་དཔེས་བརྒྱན་ཅིང་། འོད་ཟེར་འབར་བ། མེ་དཔུང་གི་དབུས་ན་བཞུགས་པ། ཞལ་རེ་རེ་སྤྱན་གསུམ་པ། 
1-154
ཐོད་སྐམ་ལྔ་ལྔས་དབུ་བརྒྱན་པ། གར་གྱི་ཉམས་དགུ་དང་ལྡན་པ། ཡབ་ཐམས་ཅད་རུས་པའི་རྒྱན་དྲུག་དང་། མི་མགོ་རློན་པ་ལྔ་བཅུའི་དོ་ཤལ་ཅན། དབུ་སྐྲ་དང་སྨ་ར་སེར་པོ་གྱེན་དུ་
འབར་བ། ཡུམ་ཐམས་ཅད་སྒེག་ཅིང་འཛུམ་པ། བདེ་བའི་ཉམས་དང་ལྡན་པ། ཤ་རྒྱས་ཤིང་ནུ་མ་འབུར་བ། མི་མགོ་སྐམ་པོ་ལྔ་བཅུའི་དོ་ཤལ་ཅན། དབུ་སྐྲ་སིལ་བུར་འཕྱང་བ། མཎྜལ་གསུམ་པོའི་
གྲུ་ཆད་རྣམས་ལ་མཆོད་པའི་ལྷ་མོ་མཆོད་རྫས་སྣ་ཚོགས་ཐོགས་པ། ཁྱམས་རྣམས་སུ་ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་ལོངས་སྐུ་ཞལ་སྦྱོར། བདེ་བ་ཆེན་པོའི་རང་བཞིན་ཏིལ་གྱི་གང་བུ་
ཁ་ཕྱེ་བ་ལྟ་བུར་བསྒོམ། མཎྜལ་བཞི་པའི་དབུས་སུ། དཔལ་ལྡན་ཕྱག་དྲུག་པ་ལྷ་ལྔ་གཏོར་ཆོག་ལྟར་བསྐྱེད། དེའི་ཁྱམས་སུ་ཕྱོགས་སྐྱོང་བཅུ། གཙང་རིས་ཀྱི་མགོན་པོ་བདུན་ཅུ་རྩ་གཉིས། དམ་ཅན་རྒྱ་
མཚོའི་ཚོགས་བསམ། དེ་རྣམས་ཐམས་ཅད་སྐད་ཅིག་དྲན་རྫོགས་བསམ། སྙིང་པོ་ཚིག་ཙམ་མམ། རྡོ་རྗེ་ཆོ་ག་གསུམ་ལས་བསྐྱེད། ཐམས་ཅད་ཀྱི་གནས་གསུམ་དུ་འབྲུ་གསུམ་གྱི་བྱིན་གྱིས་བརླབ། བདག་བསྐྱེད་མདུན་བསྐྱེད་
རྣམས་ཀྱིས་ཐུགས་ཁའི་ས་བོན་ལས། འོད་ཟེར་འཕྲོས་པས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཡེ་ཤེས་པར་སྤྱན་དྲངས་ལ་སྔགས་ཙམ་གྱིས་མཆོད། ཛཱཿཧཱུྃ་བཾ་ཧོས་དམ་ཚིག་པ་རྣམས་ལ་བསྟིམ། ཡང་འོད་ཀྱིས་དབང་གི་ལྷ་རྣམས་སྤྱན་དྲངས་ལ་མཆོད་དེ། 
1-155
ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཾ་གིས་གསོལ་བ་བཏབ་པས། དབང་གི་ལྷ་རྣམས་ཀྱིས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ར་ས་མ་ཡེ་ཤྲཱི་ཧཱུྃ། ཞེས་པས་དབང་
བསྐུར། ཐམས་ཅད་ལ་མི་བསྐྱོད་པ་སྤྲུལ་པའི་སྐུའི་རྣམ་པ་ཅན་གྱི་དབུ་བརྒྱན་པར་བསམ་ལ། ཨོཾ་སརྦ་ཏ་ཐཱ་ག་ཏ་མཎྜལ་ས་པཱ་རི་ཝ་ར་སྔོན་དུ་འགྲོ་བས། ཆུ་གཉིས་སྔོན་དུ་འགྲོ་
བའི་མཆོད་པ་རྔ་རོལ་མོ་གོས་གཟུང་རྣམས་རང་རང་གི་སྔགས་ཀྱིས་ཐུན་མོང་དུ་དབུལ། སྤྲོ་ན་ཚིགས་བཅད་ཀྱང་བྱ། ནང་མཆོད་ཀྱང་བསངས་སྦྱངས་བྱིན་གྱིས་བརླབས་ལ། རྩ་བརྒྱུད་ཀྱི་བླ་མ་རྣམས་ཀྱི་
མཚན་དང་། ཡི་དམ་རྣམས་ཀྱི་སོ་སོའི་སྔགས་ལ་འབྲུ་གསུམ་བཏགས་ལ་དབུལ། ཆོས་སྐྱོང་ལ་སོགས་ལའང་གཞན་དང་མཐུན་པར་དབུལ་ཞིང་། ཅི་ཤེས་པས་བསྟོད་ལ། བུམ་བཟླས་བྱས་ཏེ། སླར་ཡང་མཆོད་ཅིང་བསྟོད་
ལ། སྐྱོར་ཆུ་བླུགས། བདག་འཇུག་བྱ། གཏོར་མ་རྣམས་བསངས་སྦྱངས་བྱིན་གྱིས་བརླབ། ལྷ་ལྔ་གང་རུང་གི་ཆོ་ག་གཞན་དང་མཐུན་པར་བྱ། སོ་སོའི་རང་སྔགས་སམ། གོང་གི་མཆོད་སྔགས་ལ་བ་ལིནྟ་ཁ་
ཁ་ཁཱ་ཧི་ཁཱ་ཧི་བཏགས་ལ་དབུལ། མཆོད་བསྟོད་རྡོ་རྗེའི་གླུ་དང་བཀྲ་ཤིས་བརྗོད། མགོན་པོ་ལ་གཏོར་ཆོག་ལྟར་ཕུལ་འཕྲིན་ལས་གཞོལ། སྤྱི་གཏོར་དང་གཞི་བདག་ལའང་ཕུལ། བགེགས་གཏོར་གཏང་ངོ་།། །།
༄། །དངོས་གཞི་ལས། དང་པོ་སྔོན་འགྲོ་འཇུག་པ།
གཉིས་པ་དངོས་གཞི་ལ་གཉིས་ལས།
1-156
༈ དཀྱིལ་འཁོར་གསུམ་ཀ་རུ་རིམ་པས་འཇུག།
དང་པོ་སྔོན་འགྲོ་འཇུག་པ་ནི། སློབ་མ་རྣམས་ཁྲུས་བྱས། ཕྱག་དང་མཎྜལ་འཇུག་ཡོན་ཕུལ་ནས་འཁོད་པ་ལ། འདི་སྐད་བརྗོད་དེ། ཀླུ་སྒྲུབ་ཀྱིས། རྒྱ་མཚོ་ཆེར་གཡེང་གཉའ་ཤིང་བུ་གར་ནི། །རུས་སྦལ་
ཆུད་པ་བས་ཀྱང་དུད་འགྲོ་བས། །མི་ཉིད་ཆེས་ཐོབ་དཀའ་བས་མི་དབང་གི །དམ་ཆོས་སྤྱོད་པས་འབྲས་བུ་མཆིས་པར་མཛོད། །ཅེས་གསུངས་པས། མི་ལུས་རྙེད་དཀའ་བར་གསུངས་ལ། རྙེད་པའི་ཚེ་མ་འབད་
ན། འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་འདི་ལས་ཐར་པའི་སྐབས་མེད་པས་ཆོས་ལ་འཇུག་དགོས། དེ་ལ་ཐེག་ཆུང་ཉན་རང་རང་ཞི་བདེ་ཙམ་ཐོབ་པར་འདོད་ཅིང་། ལྟ་བས་བདག་དང་། ཆོས་
ཀྱི་ཕྱོགས་གཅིག་གཟུང་བ་རང་བཞིན་མེད་པ་ཙམ་ལས་མ་རྟོགས་པའི་ལམ་དེ་ཐེག་ཆེན་ལ་བལྟོས་ནས་ལམ་དམན་པ་ཡིན་ཏེ། སློབ་སྤྲིང་ལས། ཉེ་དུ་འཁོར་བའི་རྒྱ་མཚོའི་ནང་དུ་ཆུད་གྱུར་ཅིང་། །
ཀློང་གི་ནང་དུ་ལྷུང་བ་ལྟ་བུ་གནང་བཞིན་དུ། །སྐྱེ་ཤི་ཕོས་པས་ངོ་མ་ཤེས་པ་དེ་བོར་ནས། །རང་ཉིད་གཅིག་ཐར་བྱེད་ན་ཁྲེལ་བོར་གཞན་ཅི་ཡོད། །ཅེས་གསུངས་པ་དང་། མདོ་སྡེ་རྒྱན་
ལས། དེ་གཉིས་ཡང་དང་ཡང་དུ་ནི། །རང་སེམས་ཀུན་ཏུ་འབྱུང་ལྡན་པས། །མྱ་ངན་འདས་ལ་མངོན་དགའི་ཕྱིར། །རྟོགས་པ་བུལ་བ་ཡིན་པར་འདོད། །ཅེས་གསུངས་པས་ན་གཞན་དོན་དུ་རྫོགས་པའི་སངས་རྒྱས་ཐོབ་པར་འདོད་ཅིང་། 
1-157
ལྟ་བས་བདག་མཐའ་དག་རང་བཞིན་མེད་པར་རྟོགས་པའི་ཐེག་ཆེན་ལ་འཇུག་དགོས། དེ་ལ་གཉིས་ཡོད་པའི་ཕ་རོལ་དུ་ཕྱིན་པ་བས་སྔགས་ཀྱི་ཐེག་པ། དོན་གཅིག་ན་ཡང་མ་རྨོངས་དང་། །ཐབས་མང་
དཀའ་བ་མེད་པ་དང་། །དབང་པོ་རྣོན་པོའི་དབང་བྱས་ཕྱིར། །སྔགས་ཀྱི་ཐེག་པ་ཁྱད་པར་འཕགས། །ཞེས་གསུངས་པས་དེ་ལ་འཇུག་པ་ཡིན་ཏེ། དེའང་རྡོ་རྗེ་གུར་ལས། དམན་པ་རྣམས་ལ་བྱ་བའི་རྒྱུད། །
བྱ་མིན་རྣལ་འབྱོར་དེ་ལྟག་ལ། །སེམས་ཅན་མཆོག་ལ་རྣལ་འབྱོར་མཆོག །རྣལ་འབྱོར་བླ་མེད་དེ་ལྟག་ལ། །ཞེས་བྱ་བའི་བླ་མེད་ལ་འཇུག་པ་ཡིན་པས། དེའི་ཐོག་མར་དབང་ཐོབ་དགོས་ཏེ། དཔལ་ལྡན་
རྡོ་རྗེ་འཕྲེང་བའི་རྒྱུད་ལས། ཐོག་མར་སློབ་མ་གང་གི་ཚེ། །བློ་ལྡན་ཡང་དག་དབང་བསྐུར་ན། །རྫོགས་པའི་རིམ་པའི་རྣལ་འབྱོར་ལ། །དེ་ཡི་ཚེ་ན་སྣོད་དུ་འགྱུར། །ཡང་དག་དབང་བསྐུར་གྱིས་དབེན་
ན། །སྒྲུབ་པོས་རྒྱུད་ཀྱི་དོན་ཤེས་ཀྱང་། །སློབ་དཔོན་སློབ་མ་མཚུངས་པར་ནི། །མི་ཟད་དམྱལ་བ་ཆེན་པོར་འགྲོ། །ཞེས་དང་། ཕྱག་རྒྱ་ཆེན་པོ་ཐིག་ལེའི་རྒྱུད་ལས། དབང་མེད་ན་ནི་དངོས་གྲུབ་མེད། །བྱེ་
མ་བཙིར་ཡང་མར་མེད་བཞིན། །གང་ཞིག་རྒྱུད་ལུང་ང་རྒྱལ་གྱིས། །དབང་བསྐུར་མེད་པར་འཆད་བྱེད་པ། །སློབ་དཔོན་སློབ་མ་ཤི་མ་ཐག །དངོས་གྲུབ་ཐོབ་ཀྱང་དམྱལ་བར་སྐྱེ། །དེ་ནས་འབད་པ་ཐམས་ཅད་ཀྱིས། །
1-158
བླ་མ་ལས་ནི་དབང་ནོད་ཞུ། །ཞེས་དང་། མཆོག་གི་དང་པོའི་སངས་རྒྱས་ལ། །དབང་བསྐུར་མེད་པར་སྔགས་འཆད་དང་། །ཟབ་མོའི་དེ་ཉིད་སྒོམ་བྱེད་པ། །དེ་དོན་ལེགས་པར་ཤེས་ན་ཡང་། །དམྱལ་བར་འགྱུར་
གྱི་གྲོལ་བ་མིན། །ཞེས་དང་། སངས་རྒྱས་ཐོད་པ་ལས། དཔེར་ན་པི་ཝང་སྦྱོར་ཚོགས་ཀུན། །རྒྱུད་དང་བྲལ་ན་བརྡུངས་མི་ནུས། །དེ་བཞིན་དབང་བསྐུར་མེད་པ་ལ། །དེ་ལ་མཆོག་གི་དངོས་གྲུབ་མེད། །ཅེས་
དང་། ཐོབ་ན་དེ་ལས་ལྡོག་པའི་ཕན་ཡོན་འབྱུང་སྟེ། ཐུན་སང་ལས། དབང་བསྐུར་ཡང་དག་སྦྱིན་ལྡན་ན། །སྐྱེ་ཞིང་སྐྱེ་བར་དབང་བསྐུར་འགྱུར། །དེ་ནས་སྐྱེ་བ་བདུན་ནས་དེ། །མ་སྒོམ་པ་ཡང་དངོས་
གྲུབ་ཐོབ། །ཅེས་གསུངས་པས་སོ། །དབང་གི་སྔོན་དུ་དཀྱིལ་འཁོར་དགོས་ཤིང་། དེ་ལའང་གསུམ་དུ་གསུང་སྟེ། རྡོ་རྗེ་དྲིལ་བུ་པས། དབང་བསྐུར་དཀྱིལ་འཁོར་སྔོན་འགྲོ་བར། །རྡོ་རྗེ་འཆང་གི་གསུངས་པ་སྟེ། །ཞེས་
དང་། ཡེ་ཤེས་རྒྱ་མཚོའི་རྒྱུད་ལས། དབང་བསྐུར་དབང་པོའི་བྱེ་བྲག་གིས། །ཏིང་འཛིན་མེ་ཏོག་རྡུལ་མཚོན་ནོ། །ཞེས་དང་། སྐུ་གསུང་ཐུགས་ཀྱི་རྒྱུད་ལས། དཀྱིལ་འཁོར་སློབ་མ་རབ་འབྲིང་མཐའ། །ཏིང་འཛིན་མེ་ཏོག་
རྡུལ་མཚོན་རིམ། །ཞེས་གསུངས་པས། ད་ལམ་དཀྱིལ་འཁོར་གསུམ་ཀ་རུ་རིམ་པས་འཇུག་ཅིང་དབང་བསྐུར་བ་ཡིན།། །།
༈ དང་པོ་སྐྱབས་འགྲོ་ནས། ལྔ་པ་རྟོག་པ་བསྡུ་བ་རྣམས།
དེའི་སྔོན་འགྲོ་འཇུག་པ་ལ་(བཅུ་གཉིས་)ཡོད་པའི། དང་པོ་སྐྱབས་འགྲོ་ནི། སངས་རྒྱས་ཆོས་ཀྱི་སྐུ་སྟོང་པ་ཉིད་དང་། 
1-159
སྙིང་རྗེ་དབྱེར་མེད་པ། ཆོས་ཞི་བ་མྱ་ངན་ལས་འདས་པ། དགེ་འདུན་དག་པའི་ས་ལ་གནས་པ་རྣམས་ལ་སྐྱབས་སུ་འགྲོ་བའི་བསམ་པས། རང་གི་ལུས་ལོངས་སྤྱོད་ཐམས་ཅད་ལྟོས་པ་མེད་པ་
བླ་མ་ལ་བློས་ཕུལ་ལ། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། སྙིང་པོ་བྱང་ཆུབ་ལ་མཆིས་ཀྱི་བར་དུ་རྐང་གཉིས་རྣམས་ཀྱི་མཆོག་ཕྱོགས་བཅུའི་སངས་རྒྱས་
བཅོམ་ལྡན་འདས་རྣམས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག ཞི་བ་དོན་དམ་མྱ་ངན་ལས་འདས་པའི་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་ས་ཆེན་པོ་ལ་བཞུགས་པའི་
བྱང་ཆུབ་སེམས་དཔའ་ཆེན་པོ་ཕྱིར་མི་ལྡོག་པའི་དགེ་འདུན་ལ་སྐྱབས་སུ་མཆིའོ། །ཞེས་ལན་གསུམ་བརྗོད།། །།གཉིས་པ་སེམས་བསྐྱེད་པ་ལ་གཉིས་ལས། དང་པོ་སྨོན་པ་ནི། བླ་མ་ལ་སངས་རྒྱས་དངོས་ཀྱི་
འདུ་ཤེས་ཀྱིས་སྔར་ལྟར་མཆོད་ལ། བརྗོད་པར་འགྱུར་པའི་དོན་སེམས་ཤིང་། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། སློབ་དཔོན་བདག་ལ་དགོངས་སུ་གསོལ། བདག་མིང་འདི་ཞེས་
བགྱི་བས་ཚེ་འཁོར་བ་ཐོག་མཐའ་མེད་པ་ནས་ཐ་མ་ད་ལྟ་ལ་ཐུག་གི་བར་དུ་སྦྱིན་པའི་རང་བཞིན་ཅན་དང་། ཚུལ་ཁྲིམས་ཀྱི་རང་བཞིན་ཅན་དང་། སྒོམ་པའི་རང་བཞིན་ཅན་གྱི་དགེ་བའི་རྩ་བ་དེས། 
1-160
ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང་། ས་ཆེན་པོ་ལ་རབ་དུ་བཞུགས་པའི་བྱང་ཆུབ་སེམས་དཔའ་ཆེན་པོ་རྣམས་ཀྱིས་ཇི་ལྟར་ཐུགས་བསྐྱེད་
པ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་ནས་སྙིང་པོ་བྱང་ཆུབ་ལ་མཆིས་ཀྱི་བར་དུ། བྱང་ཆུབ་ཀྱི་མཆོག་དུ་སེམས་བསྐྱེད་པར་བགྱིའོ། །སེམས་ཅན་མ་བསྒྲལ་བ་རྣམས་བསྒྲལ་
བར་བགྱིའོ། །མ་གྲོལ་བ་རྣམས་གྲོལ་བར་བགྱིའོ། །དབུགས་མ་ཕྱུང་བ་རྣམས་དབུགས་དབྱུང་བར་བགྱིའོ། །ཡོངས་སུ་མྱ་ངན་ལས་མ་འདས་པ་རྣམས། ཡོངས་སུ་མྱ་ངན་ལས་འདའ་བར་བགྱིའོ། །ཞེས་ལན་གསུམ་བརྗོད་དོ། །
གཉིས་པ་འཇུག་པ་སེམས་བསྐྱེད་བླང་བའི་བསམ་པས་བརྗོད་པའི་དོན་སེམས་ཤིང་། སྔར་བཞིན་དགོངས་གསོལ་གྱི་རྗེས་སུ། བདག་མིང་འདི་ཞེས་བགྱི་བས་དུས་འདི་ནས་བཟུང་ནས་སྙིང་པོ་བྱང་ཆུབ་ལ་མཆིས་ཀྱི་
བར་དུ། སྦྱིན་པའི་ཕ་རོལ་དུ་ཕྱིན་པ་ལ་མཐར་གྱིས་བསླབ་པ་དང་། མཐར་གྱིས་སྦྱངས་པ་དང་། མཐར་གྱི་ནན་ཏན་གྱིས་བསམ་པ་བརྟན་པོ་བསྐྱེད་པར་བགྱིའོ། །ཕར་ཕྱིན་གཞན་ལྔ་ཡང་སོ་སོའི་མིང་
སྟབས་སུ་བརྗོད་ནས། བསླབ་སྦྱངས་ནན་ཏན་གྱི་བསམ་པ་སྔར་བཞིན་བརྗོད་དེ། དེ་ལྟར་ལན་གསུམ་བརྗོད་དོ།། །།སྤྱི་དོན་གསུམ་པ་གསོལ་བ་བཏབ་པ་ནི། སྔར་ཕུལ་བའི་མཎྜལ་ཡོན་དུ་དམིགས་ནས། དགའ་ཆེན་ཁྱོད་བདག་སྟོན་པ་སྟེ། །
1-161
སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་
འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་ཞུགས་སུ་གསོལ། །ཞེས་ལན་གསུམ་བྱའོ།། །།བཞི་པ་གནང་བ་སྦྱིན་པ་ནི། བུ་ཚུར་ཐེག་པ་ཆེན་པོ་
ཡི། །ཁྱེད་ནི་ཚུལ་ཆེན་སྣོད་ཡིན་ཏེ། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བསྟན་པར་བྱ། །དུས་གསུམ་གཤེགས་པའི་སངས་རྒྱས་རྣམས། །སྐུ་གསུང་ཐུགས་ཀྱི་རྡོ་རྗེ་ཅན། །དེ་དག་གིས་ཀྱང་
གསང་སྔགས་ཀྱི། །ཆོ་ག་ཟབ་མོ་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་མཚན་མེད་བརྙེས། །ཤཱཀྱ་སེང་གེ་སྐྱོབ་པ་ཡིས། །བདུད་སྡེ་ཤིན་དུ་མི་ཟད་པ། །དཔུང་ཆེན་དག་
ཀྱང་དེས་བཅོམ་སྟེ། །འཇིག་རྟེན་རྗེས་འཇུག་རྟོགས་ནས་ནི། །འཁོར་ལོ་བསྐོར་ནས་མྱ་ངན་འདས། །དེ་ནས་ཀུན་མཁྱེན་ཐོབ་བྱའི་ཕྱིར། །བུ་ཡི་བློ་གྲོས་འདི་གྱིས་ཤིག །ཅེས་བརྗོད་དོ།། །།ལྔ་པ་རྟོག་པ་བསྡུ་
བ་ནི། རྟོག་པ་ཐམས་ཅད་ལེགས་པར་བསྡུས་ནས་ནི། །ཤིན་ཏུ་བསམ་པ་བཟང་པོ་ལྡན་པས་ཉོན། །བརྗེད་ངས་བློ་ལ་རྡོ་རྗེ་སེམས་སོགས་དང་། །བདེ་བར་གཤེགས་པ་རྣམས་ཀྱི་བྱིན་མི་རློབ། །ཅེས་པས་སོ།། །།
1-162
༈ དྲུག་པ་རྒྱུན་བཤགས་སྔོན་དུ་འགྲོ་བས་གསང་སྔགས་སུ་སེམས་བསྐྱེད་པ་ནས། བཅུ་གཉིས་པ་གདོང་གཡོགས་ཕྱེ་ལ་དཀྱིལ་འཁོར་བསྟན་པ་རྣམས།
དྲུག་པ་རྒྱུན་བཤགས་སྔོན་དུ་འགྲོ་བས་གསང་སྔགས་སུ་སེམས་བསྐྱེད་པ་ནི། དཀོན་མཆོག་གསུམ་ལ་བདག་སྐྱབས་མཆིས། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་
ཡིད་ཀྱིས་གཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །
སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་ལན་གསུམ་བགྱིའོ།། །།བདུན་པ་རིགས་ལྔའི་སྡོམ་པ་གཟུང་བ་ནི།
སྲས་བཅས་སངས་རྒྱས་ཐམས་ཅད་དང་། །དཔའ་བོ་རྣལ་འབྱོར་མ་རྣམས་ཀུན། །བདག་ལ་དགོངས་པར་མཛད་དུ་གསོལ། །བདག་ནི་དུས་འདི་ནས་བཟུང་ནས། །ཇི་སྲིད་བྱང་ཆུབ་སྙིང་པོའི་བར། །ཇི་ལྟར་དུས་གསུམ་མགོན་
པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སངས་རྒྱས་རྣལ་འབྱོར་སྡོམ་པ་ལ། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་
ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །སོ་སོར་བརྟན་པོར་གཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་གཟུང་བར་བྱ། །ནམ་དུ་ཡང་ནི་མི་སྤོང་ངོ་། །
1-163
སངས་རྒྱས་རྣལ་འབྱོར་ལས་སྐྱེས་པའི། །སྡོམ་པ་དེ་ནས་བརྟན་པོར་གཟུང་། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་
བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཅན་
དག་པ་ལ། །ཕྱི་ནང་གསང་བ་ཐེག་པ་གསུམ། །དམ་པའི་ཆོས་ནི་མ་ལུས་གཟུང་། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་
ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་མེད་མཆོག །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་གཟུང་། །མ་བསྒྲལ་བ་རྣམས་བདག་གིས་བསྒྲལ། །
མ་གྲོལ་བ་རྣམས་བདག་གིས་སྒྲོལ། །དབུགས་མ་ཕྱུང་རྣམས་དབུགས་དབྱུང་ཞིང་། །སེམས་ཅན་མྱ་ངན་འདས་ལ་དགོད། །ཅེས་ལན་གསུམ་གྱིས་བྱའོ།། །།བརྒྱད་པ་སྔགས་ཀྱི་ཆེ་བ་བརྗོད་པས་སྤྲོ་བ་བསྐྱེད་པ་ནི། འཇིག་
རྟེན་དུ་ནི་ཀུན་མཁྱེན་དག །ཨུ་དུམ་ཝ་རའི་མེ་ཏོག་བཞིན། །བརྒྱ་ལམ་ན་ནི་རེ་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །གསང་སྔགས་སྤྱོད་པའི་ཚུལ་བྱུང་བ། །དེ་བས་ཀྱང་ནི་དཀོན་པ་སྟེ། །
1-164
གང་གིས་སེམས་ཅན་མཉམ་མེད་དོན། །བླ་མེད་བྱེད་པར་ནུས་པ་ཡིན། །བསྐལ་པ་བྱེ་བ་དུ་མ་རུ། །སྔོན་དུ་སྡིག་པ་བྱས་པ་གང་། །དཀྱིལ་འཁོར་འདི་འདྲ་མཐོང་མ་ཐག །དེ་དག་ཟད་པར་འགྱུར་
ཡིན་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །གང་གི་སྤྱོད་པ་མཆོག་འདི་ལ། །བློ་གྲོས་ཤིན་
ཏུ་མི་གཡོ་ན། །དུཿཁ་ཐམས་ཅད་འབྱུང་བ་ཡི། །ངན་འགྲོ་དེ་ཡིས་སྤྱོད་པར་འགྱུར། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་པ། །བདག་ཉིད་
ཆེན་པོ་ཐམས་ཅད་ཀྱིས། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་བཟུང་སྟེ་སྐྱེ་བཞིན་པ། །དེ་ཕྱིར་ཁྱེད་རྣམས་ཐེག་ཆེན་དུ། །ལེགས་པ་ཉིད་དུ་འགྲོ་བར་འགྱུར། །ཐེག་པ་ཆེན་པོ་ཆེར་འབྱུང་བའི། །
ལམ་མཆོག་འདི་ནི་དཔལ་དང་ལྡན། །ཁྱེད་རྣམས་དེར་ནི་དོང་བས་ན། །རང་བྱུང་སྐལ་པ་ཆེན་པོ་པ། །འཇིག་རྟེན་ཐམས་ཅད་མཁྱེན་པ་ཡི། །དེ་བཞིན་གཤེགས་པ་ཉིད་དུ་འགྱུར། །ཞེས་པའི་དོན་ཡང་ཅི་
རིགས་སུ་བརྗོད་ནས། དཀྱིལ་འཁོར་མ་མཐོང་བའི་བརྡར། ཨ་ཁཾ་ཝི་ར་ཧཱུྃ་གི་གདོང་བཅིང་ངོ་།། །།དགུ་པ་བདེ་སྟོང་དུ་སེམས་བསྐྱེད་པ་ནི། སློབ་མའི་སྙིང་ཁར་ཟླ་བའི་དཀྱིལ་འཁོར། ཀུན་རྫོབ་བྱང་ཆུབ་སེམས་ཀྱི་ངོ་བོ་དང་། 
1-165
དེའི་སྟེང་དུ་རྡོ་རྗེ་དཀར་པོ་རྩེ་ལྔ་པ། དོན་དམ་བྱང་ཆུབ་སེམས་ཀྱི་ངོ་བོར་མོས་སུ་བཅུག་ནས། དེ་བརྟན་པའི་དོན་དུ་དཔོན་སློབ་གཉིས་ཀས། ཨོཾ་སརྦ་ཡོ་ག་ཙིཏྟ་ཨུད་པཱ་ཏ་ཡཱ་
མི། ཞེས་དང་། སློབ་དཔོན་གྱི་སློབ་མའི་སྙིང་ཁར་རྡོ་རྗེ་རེག་ཅིང་། ཨོཾ་སུ་ར་ཏེ་ས་མ་ཡ་སྟཾ་ཧོ་སིདྡྷི་བཛྲ་ཡ་ཐ་སུ་ཁཾ། ཞེས་བརྗོད་ནས། དེང་ཁྱོད་དེ་བཞིན་གཤེགས་པ་ཐམས་ཅན་
དཔའ་བོ་དང་རྣལ་འབྱོར་མ་ཐམས་ཅད་ཀྱི་རིགས་སུ་ཞུགས་ཀྱིས། དེ་བཞིན་གཤེགས་པ་ཐམས་ཅད་ཀྱི་གསང་ཆེན་དམ་པ་འདི། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་དུ་མ་ཞུགས་པ་རྣམས་ཀྱི་
མདུན་དུ་སྨྲ་བར་མི་བྱ་སྟེ། མ་དད་པ་རྣམས་ལ་ཡང་མ་ཡིན་ནོ། །ཧཱུྃ་ཛ་ཧཱུྃ་ཞེས་པ་སྟེ་གསང་བར་གདམས་པའོ།། །། བཅུ་པ་ནང་དུ་གཞུག་ཅིང་ཡེ་ཤེས་དབབ་པ་ནི། སློབ་དཔོན་གྱིས་
དཀྱིལ་འཁོར་གྱི་ཤར་སྒོ་ནས་རྡོ་རྗེས་ཁྲིད་པར་བསམས་ཤིང་། ཛ་ཧཱུྃ་བཾ་ཧོཿ ཞེས་བརྗོད་པས་མགོ་བོ་འདུད་པ་རེ་བྱེད་དུ་བཅུག་ལ་ནང་དུ་གཞུག འཁོད་པ་ལ་སློབ་མའི་སྤྱི་བོར་རྡོ་རྗེ་
གཟུང་ལ། ཡེ་ཤེས་གང་གི་ཁྱོད་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱང་ཐོབ་པར་འགྱུར་ན། དངོས་གྲུབ་གཞན་ལྟ་སྨོས་ཀྱང་ཅི་དགོས། དེ་ལྟ་བུའི་རྡོ་རྗེ་ཡེ་ཤེས་བསྐྱེད་པར་བྱ་ཡིས། 
1-166
ཁྱེད་ཀྱིས་དཀྱིལ་འཁོར་ཆེན་པོ་མ་མཐོང་བ་རྣམས་ཀྱི་མདུན་དུ་སྨྲ་བར་མི་བྱ་སྟེ། བུ་ཁྱོད་དམ་ཚིག་ཉམས་པར་འགྱུར་ཏ་རེ། ཞེས་ཕན་ཡོན་དང་། སྙིང་ཁར་གཟུང་ལ། ཧེ་རུ་ཀ་དཔལ་དེང་
ཁྱོད་ཀྱིས། །སྙིང་ལ་ཡང་དག་གཞུག་པར་འགྱུར། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་དུ་བྲལ་ཏེ་གཤེགས། །ཞེས་དང་། ཡང་སྤྱི་བོར་གཟུང་ལ། འདི་ནི་ཁྱོད་ཀྱི་དམ་ཚིག་གི་རྡོ་རྗེ་སྟེ།
གལ་ཏེ་ཚུལ་འདི་སུ་ཡང་རུང་བ་ལ་སྨྲས་ན། འདིས་ཁྱོད་ཀྱི་མགོ་བོ་འགེམས་པར་འགྱུར་རོ། །ཞེས་པ་ཉེས་དམིགས་དང་། བུམ་ཆུ་དང་། བདུད་རྩི་བསྲེས་ལ། ཁྱོར་བ་གཡས་པར་བྱིན་ལ་འཐུང་དུ་
གཞུག་ཅིང་། འདི་ནི་ཁྱོད་ཀྱིས་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ཐོབ། །རྡོ་རྗེ་བདུད་རྩིས་ཆུ་འདིས་འགྲུབ། །ཨོཾ་པཉྩ་ཨ་མྲི་ཏ་ཨུ་ད་ཀ་ཋ་ཋ་
ཋ། ཞེས་པས་གཉིས་ཀ་དང་། ཡང་སྤྱི་བོར་གཟུང་ལ། དེང་ཕྱིན་ཆད་བུ་ཁྱོད་ཀྱིས། དཔལ་ཧེ་རུ་ཀ་ང་ཡིན་གྱི། ངས་འདི་བྱོས་ཤིག བྱ་བ་དེ་ཁྱོད་ཀྱིས་བྱ་དགོས་སོ། །ང་ལ་ཡང་བརྙས་
པ་མ་བྱོས་ཤིག བྱས་ན་ཡ་ང་བ་མ་སྤངས་པར་ཚེའི་དུས་བྱས་ཏེ། དམྱལ་བ་ཆེན་པོར་ལྟུང་བར་འགྱུར་རོ། །ཏ་རེ། ཞེས་སློབ་དཔོན་གྱིས་བཀའ་གཉན་པའི་སྒོ་ནས་དམ་ལ་བཞག་ནས། ཡེ་ཤེས་དབབ་པར་གསོལ་བ་གདབ་པའི་བསམ་པས། 
1-167
རྗེས་བཟློས་བྱེད་དུ་གཞུག་ཅིང་། དེ་བཞིན་གཤེགས་པ་ཐམས་ཅད་དང་། དཔའ་བོ་དང་རྣལ་འབྱོར་མ་ཐམས་ཅད་ཀྱིས་བྱིན་གྱིས་རློབས་ཤིག དཔལ་ཧེ་རུ་ཀ་བདག་ལ་དབབ་དུ་གསོལ། ཞེས་ལན་གསུམ་བརྗོད་ལ།
སློབ་མ་རྣམས་ལུས་ཀྱི་སྤྱོད་ལམ་ཕན་ཚུན་མ་རེག་པར་སྤྱི་བོར་ཐལ་མོ་སྦྱར་ལ་ཙོག་པུར་འདུག བླ་མ་ལ་རྡོ་རྗེ་འཆང་དངོས་ཀྱི་འདུ་ཤེས་ཀྱིས་མོས་གུས་དྲག་པོ་གྱིས་ལ། བདག་ཏུ་
གཟུང་བ་ཐམས་ཅད་ལྟོས་མེད་དུ་མཐོང་། རང་ཧེ་རུ་ཀ་ཕྱག་གཉིས་པའི་རྐང་མཐིལ་ཞིབ་ནས་ལངས་པར་མོས་པའི་འོག་ཏུ། ཡཾ་ལས་རླུང་གི་དཀྱིལ་འཁོར་གཞུའི་དབྱིབས་ཅན། རྒྱུད་གྱེན་ལ་བསྟན་པའི་སྟེང་
དུ་གནས་པའི་རྐང་མཐིལ་གཉིས་སུ་ཛྷཻཾ་མེའི་རང་བཞིན་རླུང་གིས་བསྐྱོད་པས་མེ་འབར་བ་རྩ་ནང་ན་ཡར་སོང་། སུམ་མདོའི་མེ་དང་། ལྟེ་བར་རཾ་ལས་མེའི་དཀྱིལ་འཁོར་དང་འདྲེས། སྙིང་ཁར་ལམ་ལས་
སའི་དཀྱིལ་འཁོར་རྡོ་རྗེས་མཚན་པ་བསྲེགས་པས། མགྲིན་པར་ཝཾ་ལས་ཆུའི་དཀྱིལ་འཁོར་ཝཾ་གིས་མཚན་པ་བསྐོལ། སྤྱི་བོར་ཡཾ་ལས་རླུང་གི་དཀྱིལ་འཁོར་དུ་བ་འཁྲིགས་པ་ལྟ་བུས་ཐུར་དུ་མནན་པ་ལ།
སངས་རྒྱས་དང་བྱང་ཆུབ་སེམས་དཔའ། དཔའ་བོ་དང་རྣལ་འབྱོར་མ་ཐམས་ཅད་རྒྱུད་སྡེ་ལྔའི་ཚོགས་ཀྱི་རྣམ་པས་ཐིམ་པར་སྒོམ་དུ་གཞུག སློབ་དཔོན་གྱིས། ཨོཾ་ཧྲིཿཧ་ཧ་ཧཱུྃ་ཧཱུྃ་ཕཊ། བཛྲ་ཨ་པེ་ཤ་ཡ་ཨཱ་ཨ། 
1-168
ཞེས་བརྗོད་ཅིང་རོལ་མོ་བྱ། ཨོཾ་ཏིཥྛ་བཛྲས་བརྟན་པར་བྱའོ།། །།བཅུ་གཅིག་པ་མེ་ཏོག་དོར་ཅིང་མགོ་ལ་བཅིངས་པ་ནི། ལྷ་ཐམས་ཅད་དག་པ་ཡེ་ཤེས་གཅིག་གི་སྣང་བ་ཡིན་པས་བཟང་ངན་མེད་
ཀྱང་། ལས་བསགས་པའི་ལྷ་ལ་བབས་པར་གྱུར་ཅིག་སྙམ་པས། ཨོཾ་པྲ་ཏིཙྪ་བཛྲ་ཧོ། ཞེས་པས་མེ་ཏོག་དོར་ནས་གང་ལ་ཕོག་པའི་ལྷའི་སྙིང་པོ་སྔོན་དུ་འགྲོ་བས། ཨོཾ་པྲ་ཏི་གྲིཧྣ་སྭ་མི་
མཾ། སཏྭ་མཧཱ་བཱ་ལ་ཨོཾ། ཞེས་པས་སྤྱི་བོར་སྦྱིན་ནོ།། །།བཅུ་གཉིས་པ་གདོང་གཡོགས་ཕྱེ་ལ་དཀྱིལ་འཁོར་བསྟན་པ་ནི། ཧེ་རུ་ཀ་དཔལ་དེང་ཁྱོད་ཀྱིས། །མིག་འབྱེད་པར་ནི་བརྩོན་པར་མཛད། །ཕྱེ་བས་
ཐམས་ཅད་མཐོང་འགྱུར་བའི། །རྡོ་རྗེའི་མིག་ནི་བླ་ན་མེད། །ཨོཾ་བཛྲ་ནཻ་ཏྲ་ཨ་ཝ་ཧ་ར་པ་ཏྲ་ལཾ་ཧྲྀ་པྲཾ། ཞེས་པས་གདོང་གཡོགས་བསལ། དཀྱིལ་འཁོར་རྟེན་དང་བརྟེན་པར་བཅས་པ་བསྐྱེད་པའི་
སྐབས་བཞིན་བསྟན་པར་བྱའོ། །དེང་དཔལ་ལྡན་འབྲས་སྤུང་གི་མཆོད་རྟེན་རྒྱུ་རིན་ཆེན་ལས་གྲུབ་པ་ཕྱི་མཆོད་རྟེན་གྱི་རྣམ་པ། ནང་གཞལ་ཡས་ཁང་གི་རྣམ་པ། རྒྱུད་སྡེ་ལྔའི་ལྷ་ཚོགས་ཀྱི་རྣམ་པ་
འདི་ལྟ་བུར་ཡོད་ལ་དེའང་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་འཕྲིན་ལས་ཀྱི་ངོ་བོ་ཡིན་ཏེ། དཔལ་དུས་འབྱུང་གི་རྒྱུད་ལས། དེ་ནས་ཡང་དག་བཤད་བྱ་བ། །སྐུ་ནི་ཀྱེའི་རྡོ་རྗེ་ལ། །
1-169
གསུང་ནི་སྒྱུ་འཕྲུལ་རྡོ་རྗེ་ལ། །ཐུགས་ནི་འཁོར་ལོ་སྡོམ་པ་ཆེ། །འཕྲིན་ལས་རྡོ་རྗེ་འཇིགས་བྱེད་ལ། །བདག་ཉིད་གསང་བ་འདུས་པར་བརྗོད། །མ་འོངས་སེམས་ཅན་དུས་སུ་ནི། །ཐབས་ནི་དེ་དག་བསྟན་
པ་ཡིན། །ཐབས་ཀྱི་རིམ་པ་འདི་དག་ནི། །ཀུན་གྱི་ཐུང་མོང་མ་ཡིན་ཏེ། །དཀྱིལ་འཁོར་གཅིག་ཏུ་བསྡུས་དབང་བསྐུར། །གསང་སྔགས་སྤྱོད་པའི་རྣལ་འབྱོར་པས། །རྒྱུད་སྡེ་རྣམ་པ་གང་ལྟར་བསྟན། །ཀླ་ཀློའི་སྐད་
ཀྱིས་འདི་སྦས་པས། །ཐུབ་པའི་ཞལ་ཐེམ་གསང་བ་འདི། །སྙིང་པོ་ཀུན་གྱི་དོན་གྱི་རྒྱུད། །དཀའ་ཐུབ་སྤྱོད་བྱེད་ཐུང་མོང་ཡིན། །ཞེས་དང་། སློབ་དཔོན་རྡོ་རྗེ་གདན་པས་མཛད་པའི་བསྟན་བཅོས་ལས་ཀྱང་། རྡོ་
རྗེ་འཆང་ཆེན་ལྷའི་གཙོ། །སྐུ་ནི་དགེས་པ་རྡོ་རྗེ་ལ། །གསུང་ནི་སྒྱུ་འཕྲུལ་ཆེན་མོ་ལ། །ཐུགས་ནི་རྡོ་རྗེ་གསང་བ་འདུས། །ཡོན་ཏན་བདེ་ཆེན་འཁོར་ལོ་སྡོམ། །འཕྲིན་ལས་རྡོ་རྗེ་འཇིགས་བྱེད་དེ། །
ཕྱོགས་ནི་དཀྱིལ་འཁོར་ངེས་པ་ཅན། །ཞེས་གསུང་། དེ་རྣམས་ཐམས་ཅད་དཀྱིལ་འཁོར་གཅིག་བསྒོམ་པས་ཀྱང་། རྒྱལ་བ་ཐམས་ཅད་བསྒོམ་པར་འགྱུར་ཏེ། རིན་ཆེན་རྒྱ་མཚོའི་རྒྱུད་ལས། རྒྱལ་བ་གཅིག་བསྒོམ་སངས་རྒྱས་ཀུན་
གྱི་ངང་། །སངས་རྒྱས་ཐམས་ཅད་རིགས་ལྔའི་རང་བཞིན་ནོ། །ཞེས་གསུངས་སོ། །ཞེས་ངོ་སྤྲད་དོ།། །།
༄། །དབང་དངོས།
གཉིས་པ་དབང་དངོས་ལ།
༈ བུམ་པའི་དབང་སོགས།
བུམ་པའི་དབང་དང་། ཏིང་ངེ་འཛིན་གྱི་དབང་གཉིས་ལས། བུམ་པའི་དབང་གི་དོན་དུ་མཎྜལ་ཕུལ་ལ། 
1-170
བསམ་གྱིས་མི་ཁྱབ་དམ་ཆོས་སྣོད། །དབང་བསྐུར་དམ་པ་མཛད་དུ་གསོལ། །ལན་གསུམ་གསོལ་བ་གདབ། སྡོམ་པ་རྒྱ་མཚོ་དང་། རྡོ་རྗེ་སྙིང་པོ་རྒྱན་གྱི་རྒྱུད་ལས། སྐྱོབ་པས་དཀྱིལ་འཁོར་མངོན་སུམ་དུ། །ཏིལ་
གྱི་གང་བུ་བཞིན་གང་བའི། །རྒྱལ་བས་བུམ་པ་བཟུང་ནས་ནི། །དེ་ཉིད་ལ་ནི་དབང་བསྐུར་བར། །དཀྱིལ་འཁོར་དེ་ཉིད་རིག་པས་བསམ། །ཞེས་པ་ལྟར་དཔོན་སློབ་གཉིས་ཀས་བསམ་ཞིང་། བུམ་པ་སྤྱི་བོར་
བཞག ཧཱུྃ། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་
ཏ་ས་མ་ཡེ་ཤྲཱི་ཧཱུྃ། ཞེས་པས་སྤྱི་བོར་གཏོར་ཞིང་ཁར་ཡང་བླུད་པས། ལུས་ཀྱི་དྲི་མ་དག་ཅིང་བུམ་དབང་ཐོབ་པར་བསམ་མོ། །གཉིས་པ་གསང་དབང་ནི། བདེ་མཆོག་བདེ་བའི་མྱུ་གུ་ལས།
ཕྱོགས་བཅུའི་རྒྱལ་བ་སྲས་བཅས་ཀྱིས། །མཁའ་མཉམ་ཡེ་ཤེས་བདུད་རྩི་ནི། །རྡོ་རྗེའི་ལམ་ནས་བྱུང་ནས་ནི། །བདེ་བ་བསྐྱེད་ཕྱིར་རིགས་ཀྱི་ཡུམ། །སྲས་བཅས་གསང་བའི་དབང་བསྐུར་བྱ། །ཞེས་གསུང་པ་ལྟར་བསམ་
ལ། བུམ་ཆུ་དང་མངར་གསུམ་སྦྱར་བ་སློབ་མའི་ཁ་རུ་སྦྱིན་ཞིང་། ཕྱོགས་བཅུའི་སངས་རྒྱས་ཐམས་ཅད་ཀྱི། །གསང་གསུམ་གནས་ལས་བྱུང་བ་ཡིས། །ཁམས་གསུམ་ཀུན་གྱིས་ཕྱག་བྱས་པའི། །རྡོ་རྗེ་དབང་སྐུར་ཆེན་མོ་སྦྱིན། །
1-171
ཨོཾ་སརྦ་ཏ་ཐཱ་ག་ཏ་གྷུ་ཧེ་ཡ་ཨ་བྷི་ཥིཉྩ་མཾ། ཞེས་པས་ངག་གི་དྲི་མ་དག གསང་དབང་ཐོབ་པར་བསམ་མོ། །གསུམ་པ་ཤེས་རབ་ཡེ་ཤེས་ནི། སྔར་སྦྱིན་པའི་དབང་རྫས་བཏུང་བས།
སྙིང་ཁ་ཡན་ཆད་ཁེངས་པས་ཡིད་ཀྱི་དྲི་མ་དག་ཅིང་། །གསུམ་པའི་ཡེ་ཤེས་བདེ་སྟོང་སྐྱེས་པར་བསྒོམ་དུ་བཅུག་ལ། ཨོཾ་སརྦ་ཏ་ཐཱ་ག་ཏ་པྲཛྙ་ཛྙཱ་ན་ཨ་བྷི་ཥིཉྩ་མཾ། ཞེས་བརྗོད་དོ། །
དེ་ནས་དབང་བཞི་པ་ནི། ཨོཾ་སརྦ་ཏ་ཐཱ་ག་ཏ་ཙ་ཏུར་ཨ་བྷི་ཥིཉྩ་མཾ། ཞེས་བརྗོད། བུམ་ཆུས་ལུས་ཀྱི་ནང་ཐམས་ཅད་ཁེངས་པས། དྲི་མ་ཐམས་ཅད་དག་ཅིང་དབང་བཞི་པ་ཐོབ། འཛིན་
རྟོག་ཐམས་ཅད་དང་བྲལ་བ་བརྗོད་བྲལ་ལྷན་ཅིག་སྐྱེས་པའི་ཡེ་ཤེས་རྒྱུད་ལ་སྐྱེས་པར་བསམ་མོ། །ཆུ་ལྷག་མ་ཡར་ལུད་པ་ལས་མི་སྐྱོད་པ་སྤྲུལ་པའི་སྐུའི་རྣམ་པ་ཅན་གྱིས་དབུ་བརྒྱན་པར་
བསྒོམ་མོ།། །།
༈ ཏིང་ངེ་འཛིན་གྱི་གདམས་ངག་དབང་དང་རྗེས་སུ་འབྲེལ་བ།
གཉིས་པ་ཏིང་ངེ་འཛིན་གྱི་གདམས་ངག་དབང་དང་རྗེས་སུ་འབྲེལ་བ་དང་། དབང་གདམས་ངག་དང་འབྲེལ་བ་གཉིས་ལས། དང་པོ་ནི། དཔོན་སློབ་གཉིས་ཀས་མདུན་གྱི་ནམ་མཁར་བླ་མ་ཡི་དམ་
སངས་རྒྱས་དང་། བྱང་ཆུབ་སེམས་དཔའ་དཔའ་བོ་དང་རྣལ་འབྱོར་མ་ཡེ་ཤེས་ཀྱི་ཆོས་སྐྱོང་སྲུང་མ་དཔག་དུ་མེད་པ་ཏིལ་གྱི་གང་བུ་ཁ་ཕྱེ་བ་བཞིན་བསམས་ཏེ། སློབ་མས་མཎྜལ་ལན་གསུམ་ཕུལ་ལ། 
1-172
གསོལ་བ་གདབ་པ་ནི། རྩ་བ་དང་བརྒྱུད་པར་བཅས་པའི་བླ་མ་རྣམས་ཀྱིས་བདག་ལ་ཡང་དག་པར་སྒྱུ་ལུས་ཀྱི་དབང་བསྐུར་དུ་གསོལ། ཡེ་ཤེས་ཆོས་སྐྱོང་སྲུང་མ་རྣམས་ཀྱིས་བདག་ལ་ཡང་དག་
པར་སྒྱུ་ལུས་ཀྱི་དབང་ཞུ་བ་དང་ལམ་ཉམས་སུ་ལེན་པ་ལ་བར་ཆད་མི་འབྱུང་བར་མཛད་དུ་གསོལ། ཞེས་ལན་གསུམ་བརྗོད་དོ། །དེ་ནས་སློབ་མའི་སྤྱི་བོར་ཨོཾ་དཀར་པོ་བསམ། དེ་ལས་འོད་
ཟེར་དཀར་པོ་འཕྲོས་པས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྐུའི་ཡོན་ཏན་བསྡུས། སླར་ཨོཾ་ལ་ཐིམ་པས་དེ་ཞུ་བ་ཚངས་བུག་ནས་ལྟེ་བར་བྱོན། ཐིག་ལེ་དཀར་པོ་གཅིག་ཏུ་གྱུར།
དེས་གཏི་མུག་དག ཆོས་དབྱིངས་ཡེ་ཤེས་སུ་བྱིན་གྱིས་བརླབས། དེ་བཞིན་དུ་སྤྱི་བོར་ཨཱ་དམར་པོ། ཧཱུྃ་སྔོན་པོ། ཏྲཾ་སེར་པོ། ཨ་ལྗང་ཁུ་རྣམས་རིམ་བཞིན་བསམ་པ་ལ། ཡི་གེ་རང་རང་དང་
ཁ་དོག་འདྲ་བའི་འོད་ཟེར་རྣམས་འཕྲོས། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་གསུང་དང་། ཐུགས་དང་། ཡོན་ཏན་དང་། འཕྲིན་ལས་ཀྱི་བྱིན་རླབས་རྣམས་བསྡུས། ཡི་གེ་སོ་སོ་ལ་ཐིམ་པས། དེ་ཞུ་
ནས་ཚངས་བུག་ནས་ལྟེ་བར་བྱོན་པས། རང་རང་གི་ཁ་དོག་ཅན་གྱི་ཐིག་ལེར་གྱུར་པས། འདོད་ཆགས་དང་། ཞེ་སྡང་དང་། ང་རྒྱལ་དང་། སེར་སྣ་དང་། ཕྲག་དོག་གི་དྲི་མ་རྣམས་དག སོ་སོར་རྟོག་པ། 
1-173
མེ་ལོང་ལྟ་བུ། མཉམ་པ་ཉིད། བྱ་བ་གྲུབ་པའི་ཡེ་ཤེས་རྣམས་སུ་གྱུར་ནས་རང་ཉིད་ཡེ་ཤེས་རང་སྣང་གི་བདེ་མཆོག་ལྷན་སྐྱེས་སུ་ལམ་བསྒོམ་མོ། ། གཉིས་པ་དབང་གདམས་ངག་དང་འབྲེལ་བ་
ནི། མཎྜལ་གསུམ་པའི་སྟེང་གི་ནམ་མཁར་རིན་པོ་ཆེའི་ཁྲི་སེང་གེས་བཏེགས་པར་པད་ཉི་ཟླ་བའི་གདན་ལ་བླ་མ་བདེ་མཆོག་དང་གཉིས་སུ་མེད་པ། སྙིང་པོའི་རྣལ་འབྱོར་མ་བཞིས་བསྐོར་བར་བསྒོམ་
པ་ལ། རང་གི་ལུས་ལོངས་སྤྱོད་དགེ་རྩ་ཐམས་ཅད་ཕུལ། མོས་གུས་བྱ་ཞིང་། བླ་མ་རིན་པོ་ཆེས་བདག་ལ་བུམ་པའི་དབང་སྐུར་དུ་གསོལ། ཞེས་གསོལ་བ་བཏབ་པས་བླ་མའི་སྨིན་ཕྲག་ནས་འོད་
ཟེར་དཀར་པོ་བྱུང་། རང་གི་སྨིན་ཕྲག་ཏུ་ཐིམ་པས་ལུས་ཀྱི་སྡིག་སྒྲིབ་ནད་གདོན་ཐམས་ཅད་བསངས་དག རང་ལྷ་སྐུར་སྔར་བས་ཀྱང་གསལ་བར་བསམ། ཡང་མཆོད་པ་ཕུལ། གསང་བའི་དབང་བསྐུར་དུ་གསོལ།
ཞེས་གསོལ་བ་བཏབ་པས། བླ་མ་ཡབ་ཡུམ་གྱི་སྦྱོར་མཚམས་ནས་ཐིག་ལེ་དཀར་པོ་བྱུང་། རང་གི་ལྕེ་ལ་ཐིམ། ངག་གི་དྲི་མ་དག ལྷ་སྐུ་སྔར་བས་ཀྱང་གསལ་བ་བསམ། ཡང་མཆོད། ཤེས་རབ་
ཡེ་ཤེས་ཀྱི་དབང་བསྐུར་དུ་གསོལ། ཞེས་གསོལ་བ་བཏབ་པས། བླ་མའི་ཐུགས་ཁ་ནས་འོད་ཟེར་ཁ་དོག་སྣ་ལྔ་བྱུང་། རང་གི་སྙིང་ཁར་ཐིམ་པས་ཡིད་ཀྱི་དྲི་མ་དག ལྷ་སྐུར་སྔར་བས་ཀྱང་གསལ་བ་བསྒོམ། 
1-174
དེའི་ངང་ལས་ལུས་ཁོངས་གློད། སེམས་སྤྲོས་མེད་ལྷན་ཅིག་སྐྱེས་པའི་ཕྱག་རྒྱ་ཆེན་པོའི་ངང་དུ་མ་བཅོས་པར་ལྷན་གྱིས་བཞག་པ་ནི་དབང་བཞི་པའོ། །ཡང་དབང་གདམས་ངག་དང་འབྲེལ་བ་ལ་གསུམ་སྟེ།
དང་པོ་སྟོང་པས་གཞི་བྱས་རིག་པ་སྣ་ཚོགས་སུ་འཆར་བ་ནི། རང་གི་རྩྭ་དབུ་མ་ཕྱི་དཀར་ལ་ནང་དམར་བ། སྤྱི་གཙུག་ནས་གསང་གནས་སུ་ཟུག་པ། གསལ་བཏབ་པའི་ནང་དུ་སྙིང་གི་
ཐད་ཀར་ཨཱ་དཀར་པོ་བསམ་ལ། དེ་ངག་དུ་ཡང་མང་དུ་བརྗོད་ལ། དབུ་མ་བྱེ་གསལ་ལ་མཐར་སྟོང་ཉིད་འོད་གསལ་གྱི་ངང་ལ་སིང་གིས་བཞག་གོ །གཉིས་པ་རྩ་ལམ་སྦྱང་། རིག་པ་སྣ་
ཚོགས་སུ་འཆར་བ་ནི། རང་གི་སྤྱི་བོར་ཧཾ་དཀར་པོ། མགྲིན་པར་ཨཱཿདམར་པོ། སྙིང་ཁར་ཧཱུྃ་སྔོན་པོ། ལྟེ་བར་ཨ་དམར་ལྗང་བསམ། ཧཾ་ལས་འོད་ཟེར་དཀར་པོ་གསལ་སིང་བ་འཕྲོས། སྤྱི་བོའི་རྩ་
མདུད་རྣམས་གྲོལ། མགྲིན་པའི་ཨ་གསོས། དེ་ལ་འོད་ཟེར་དམར་པོ་གསལ་སིང་བ་བྱུང་། མགྲིན་པའི་རྩ་མདུད་གྲོལ། སྙིང་ཁའི་ཧཱུྃ་གསོས། དེ་ལས་འོད་ཟོར་སྔོན་པོ་གསལ་སིང་བ་བྱུང་། སྙིང་ཁའི་རྩ་མདུད་
རྣམས་གྲོལ། ལྟེ་བའི་ཨ་གསོས། དེ་ལས་འོད་ཟེར་དམར་ལྗང་གསལ་སིང་བ་བྱུང་། ལྟེ་བ་ནས་རྐང་མཐིལ་ཡར་ཆད་ཀྱི་རྩ་མདུད་རྣམས་གྲོལ། བདེ་སིང་བ་ལ་སེམས་གཏད་པའི་ངང་ནས་ལྷན་སྐྱེས་སུ་ལམ་གྱི་བསྒོམ་མོ།། །།
1-175
༄། །ལུས་དག་པ་ལྷ་སྐུར་བསྒོམ་པ།
གསུམ་པ་ལུས་དག་པ་ལྷ་སྐུར་བསྒོམ་པ་ནི་ལྷན་སྐྱེས་སུ་གསལ་བ་དེའི་ནོར་བུའི་རྩེ་མོར་ཧཱུྃ་སྔོན་པོ་མགོ་གྱེན་ལ་བསྟན་པའི་རྩེ་མོར་ཐིག་ལེ་དམར་པོ་སྲན་མ་ཙམ་གཅིག་བསམ་ལ་
ཧཱུྃ་གི་ནུས་པས་ནོར་བུ་ནང་དུ་བཟློག་པ་བཞིན་དུ་བྱུང་སྙིང་ཁར་སླེབས། སྨད་ཀྱི་འདོད་ཆགས་སངས་དག་པར་བསམ། དབུ་མའི་ཡར་རྩེ་སྤྱི་བོར་ཧཾ་དཀར་པོ་མགོ་ཐུར་བསྟན་གྱིས་རྩེ་ལ་ཐིག་
ལེ་དཀར་པོ་སྲན་མ་ཙམ་བསམ་པ་དབུ་མ་ན་མར་ལ་བྱུང་། སྙིང་ཁར་སླེབས་པས་གཏི་མུག་དག་པར་བསམ། ཞེ་སྡང་རང་དག་ཡིན་གསུང་། དེ་ནས་ཡང་ཡང་གསལ་གདབ་ཅིང་། ཐིག་ལེ་གཉིས་པོ་
སྙིང་ཁར་ར་ཐག་བཞིན་དུ་འཁོར་བ་ལ་དམིགས་པ་བུམ་དབང་། གཅིག་ལ་གཅིག་རེག་པས་བདེ་སིང་སིང་བ་ལ་གཏད་པ་གསང་དབང་། ཕན་ཚུན་འདྲེས་པས་བདེ་སིང་སིང་བ་དབང་གསུམ་པ་གཅིག་ལ་
གཅིག་ཐིམ་ནས་མཐར་འོད་དུ་ཡལ་ནས་སྟོང་ཉིད་དུ་ལྷན་བཞག་པ་ནི་དབང་བཞི་པའོ། །དེ་རྣམས་ནི་ཆོས་དྲུག་གའུ་མ་དང་བཅས་པའི་འཇུག་སྒོ་ཐུན་མོང་དུ་བྱས་པ་ཡིན་ལ། གང་ཟག་སྤྲོས་
པ་ལ་དགའ་བས་སོ་སོར་བྱེད་ན། མཎྜལ་དང་པོ་གཉིས་དང་། བཞི་པ་ལ་བརྟེན་ནས་བདག་བསྐྱེད་མདུན་བསྐྱེད། བུམ་པ་ཆོས་སྐྱོང་རྣམས་བསྐྱེད་པ་ནས། བུམ་དབང་དང་འབྲེལ་བའི་དབང་བཞི་ཡན་ཆད་བསྐུར་བ་ནི། 
1-176
སྤྱིའི་འཇུག་སྒོ་རྒྱུད་སྡེ་ལྔའི་དབང་ཡིན། དེ་ནས་མཎྜལ་གསུམ་པའི་བསྐྱེད་ཆོག་བཞིན། བདག་བསྐྱེད་མདུན་བསྐྱེད་བསྒོམ་བཟླས་མཆོད་གཏོར་རྣམས་བྱས། དབང་གི་སྔོན་འགྲོའི་ཆོས་རྣམས་གོང་བཞིན་རྒྱུན་བཤགས་ཡན་ཆད་དྲུག་པོ་
རྒྱས་པར་གྲུབ་ན་ལེགས། ཅི་སྟེ་མ་གྲུབ་ན་སྐྱབས་འགྲོ་སེམས་བསྐྱེད་ཙམ་བྱས་ནས་གོང་གི་ཏིང་ངེ་འཛིན་གྱི་དབང་གི་གདམས་ངག་དབང་དང་འབྲེལ་བ་ནི་སྒྱུ་ལུས་ཀྱི་སྒོས་དབང་། དབང་གདམས་ངག་
དང་འབྲེལ་བ་གོང་མའི་དམིགས་པ་ནི། གའུ་མའི་སྒོས་དབང་། དབང་གདམས་ངག་དང་འབྲེལ་བ་འོག་མའི་སྟོང་པས་གཞི་བྱས་རིག་པ་སྣ་ཚོགས་སུ་འཆར་བ། འོད་གསལ་གྱི་སྒོས་དབང་། རྩ་ལམ་སྦྱང་རིག་
པ་སྣ་ཚོགས་སུ་འཆར་བ་དང་། སྲིད་པའི་དབང་ཞུ་བ་ཐབས་ལམ་གྱི་སྒོས་དབང་། རང་ལུས་དག་པ་ལྷ་སྐུར་བསྒོམ་པ་རྨི་ལམ་གྱི་སྒོས་དབང་དེས་བར་དོའི་སྒོས་དབང་དུའང་འགྲོ་སྟེ། རྨི་ལམ་
ཟིན་ན་བར་དོ་ཉམས་འོག་ཏུ་ཚུད་པས་སོ། །འཕོ་བ་ལ་རྣལ་འབྱོར་མའི་བྱིན་རླབས་གང་རུང་ཏེ། མཁའ་སྤྱོད་མའི་ཐོབ་ན་ལེགས་སོ། །གང་ལྟར་ཡང་གསུམ་པ་རྗེས་ལ་བླ་མ་ལ་ཡོན་དབུལ།
ཚོགས་ལ་རོལ། ལྷག་གཏོར་དང་། རྡོ་རྗེའི་གླུ་བཀྲ་ཤིས་བསྔོ་བ་སྨོན་ལམ་རྣམས་བྱ། གཏང་རག་གི་མཆོད་པ་དབུལ། འདོད་དོན་ལ་གསོལ་བ་བཏབ། བཟོད་གསོལ་དང་གཤེགས་གསོལ་བྱ། ཡི་གེ་གསུམ་གྱིས་བདག་བསྲུང་། 
1-177
ལས་ཀྱི་རྗེས་མི་མངོན་པར་བྱའོ། །འཆུག་མེད་ལམ་ཁྱེར་རྣམ་གསུམ་གྱི་འཇུག་སྒོ་དང་། འཆི་མེད་ཀྱི་འཇུག་སྒོ་ཟུར་ན་ཡོད། འདི་དག་ནི་ཡེ་ཤེས་ཀྱི་མཁའ་འགྲོ་མ་ནི་གུ་མའི་གསུང་ངག་ལས།
གྲུབ་ཐོབ་ཁྱུང་པོ་རྣལ་འབྱོར་པས་ཞིབ་པར་བཀྲལ་བ་ལ། རང་གི་བརྒྱུད་པའི་བླ་མ་རྣམས་ཀྱིས་ཕྱག་ལེན་དུ་མཛད་ཚོད་རྣམས་དཀྱུས་གོ་བར་བྲིས་པ་ནི། དགེ་བའི་བཤེས་གཉེན་སྒྲུབ་པ་པོ་དར་
མ་བློ་གྲོས་ལ་སོགས་གུས་ལྡན་སློབ་མས་གསོལ་བ་བཏབ་ནས། སྒྱུ་ལུས་ཀྱི་བཙུན་པ་གངས་ཁྲོད་པས་ཡོས་བུའི་ལོ་ཟླ་བ་བཞི་པའི་ཚེས་བཅུ་དྲུག་ལ་གྲུབ་པར་དབེན་གནས་རྡོ་རྗེ་གདན་དུ་
སྦྱར་བ་དགེ་ལེགས་སུ་གྱུར་ཅིག །འདིས་སེམས་ཅན་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག། །།དགེའོ།། ༈ །། འདིས་གཏོར་ཆོག་གི་སྐབས་སུ་ལྷ་ལྔའི་བསྟོད་པ་མ་གྲུབ་ན། ཆོས་དབྱིངས་རྣམ་དག་དབྱིངས་
ལས་མ་གཡོས་ཀྱང་། །ཐབས་ཀྱིས་ཁྲོ་བོའི་སྐུར་སྟོན་གདུག་པ་འདུལ། །ཆེ་བའི་ཆེ་མཆོག་ལྷ་ཡི་ལྷར་གྱུར་པ། །ཀུན་བཟང་ཧེ་རུ་ཀ་ལ་ཕྱག་འཚལ་ལོ། །ཐམས་ཅད་དངོས་པོའི་རང་བཞིན་མཆོག །གདོད་ནས་
ཐམས་ཅད་བདག་ཉིད་གནས། །ཐབས་དང་ཤེས་རབ་གཉིས་མེད་པའི། །ཀྱེའི་རྡོ་རྗེ་ལ་ཕྱག་འཚལ། །མི་སྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །གསང་བའི་དབྱིངས་ལ་ཕྱག་འཚལ་ལོ། །
1-178
དུས་གསུམ་སངས་རྒྱས་ཐམས་ཅད་ཀྱི། །ཡེ་ཤེས་སྒྱུ་མའི་རྣམ་འཕྲུལ་གྱིས། །བདེ་བ་མཆོག་ལ་རྣམ་རོལ་པའི། །སྒྱུ་མ་ཆེན་མོ་ལ་ཕྱག་འཚལ། །དུར་ཁྲོད་རྒྱན་གྱིས་ལེགས་བརྒྱན་པའི། །ཞེ་སྡང་གཤིན་རྗེ་གཤེད་
པོ་ནི། །དངོས་མེད་ནམ་མཁའ་ལྟ་བུ་ལ། །ཐུགས་རྗེས་སྤྲུལ་པའི་སྐུར་སྟོན་པའི། །ཡེ་ཤེས་ཁྲོ་རྒྱལ་རབ་འཇིགས་པ། །དུད་ཁ་མུན་ཆེན་ཁྱེད་ལ་འདུད། །ཅེས་པས་བསྟོད། མདོར་བསྡུས་པ་ནི། རིགས་ལྔའི་སྤྱི་
བསྟོད་གང་ཡང་རུང་བ་བྱའོ།། །།ཞེས་ཀྱང་བྲིས།། །།མངྒལཾ།། །།ཤུ་བྷཾ།། །།ཨྠིྀཚཿ།། 
